Hepatitlər barədə qısa məlumat

Hazırda dünyada geniş yayılmış virus hepatitləri səssiz gedir və bir müddət sonra qaraciyər sirrozu və xərçənginə gətirib çıxarır. Buna səbəb kiçik mikroorqanizmlər olan DNT və RNT tərkibli hepatit viruslarıdır. İnsan orqanizminə daxil olan bu viruslar qaraciyər hüceyrələrində artıb çoxalmağa başlayır və tədricən qaraciyər hüceyrələrini zədələyir. Bu müddət ərzində yoluxmuş şəxsdə heç bir simptom olmur və belə şəxslər zahirən özünü tam sağlam hiss edir. Qaraciyər hüceyrələri sıradan çıxdıqca bərkiyir, ölçüsü kiçilir və funksiyası azalmağa başlayır. Xəstə şəxsdə sağ qabırğaaltı nahiyədə ağrı, köp, halsızlıq müşahidə edilir. Qaraciyər hüceyrələrinin müəyyən hissəsi sıradan çıxdıqda qaraciyər sirrozu və müalicə olunmazsa və proses davam edərsə qaraciyər xərçənginə keçir. Bu pataloji prosesin hər hansı bir mərhələsində müalicə başlanılsa və virus tam təmizlənsə proses həmin mərhələdə dayanmış olur, xəstəliyin inkişaf zənciri qırılır.